糌粑-黑土地组合

༄༅། །རྩམ་པ། གཞས་ཚིག སྒོམ་པ་བཀྲ་ཤིས། གཞས་གདངས ཚུལ་ཁྲིམས། གཞས་མཁན ས་ནག་གཞས་ཚོགས། རྗེ་བཙུན་སྒྲོལ་མས་བོད་ཁམས་གླིང་དགུ་ཡི། ། མ་སངས་སྤུན་དགུའི་བུ་རྒྱུད་སྤྱི་སྐལ་དུ། ། རྫུ་འཕྲུལ་མཐུ་ཡིས་བཏབ་པའི་སྔོན་མོ་ནས། ། སྲིད་པའི་གནམ་སའི་བཅུད་ཀྱིས་བསྐྱངས་ནས་འཁྲུངས། ། དེ་ཕྱིར་ཟས་མཆོག་རྩམ་པ་ཟ་བའི་ལུས་ན་མདངས་ཤིག་ཡོད། ། ཞིམ་ཞིམ་འདྲ་བའི་ཟས་རིགས་མང་ན་ཡང་། ། མགོན་སྐྱབས་ལྷ་ཡི་མཆོད་རྫས་རྩམ་པ་ཡིན། ། མགོ་ནག་མི་ཡི་ཁ་ཟས་རྩམ་པ་ཡིན། ། ཨ་མའི་བྱམས་བརྩེས་འཐག་པའི་རྩམ་པར་འགྲན་ནུས་མེད། ། སྤྱན་རས་གཟིགས་ཀྱིས་གངས་རིའི་ལྗོངས་ཆེན་གྱི། ། དབུ་ནག་མི་འུ་གདུང་དྲུག་ཟས་སྐལ་དུ། ། ཐུགས་རྗེ་ཕྱག་གིས་བཏབ་པའི་དཀར་མོ་ནས། ། ཉི་ཟླའི་གཟི་བྱིན་འོད་ཀྱིས་བསྐྱངས་ནས་འཁྲུངས། ། དེ་ཕྱིར་སྦྲང་དཀར་རྩམ་པ་ཟ་བའི་སྐད་ལ་སྙན་ཞིག་ཡོད། ། ཞིམ་ཞིམ་འདྲ་བའི་ཟས་རིགས་མང་ན་ཡང་། ། གསལ་རིག་སེམས་ཀྱི་ལོངས་སྤྱོད་རྩམ་པ་ཡིན། ། རྒས་མེད་ལུས་ཀྱི་འཚོ་རྟེན་རྩམ་པ་ཡིན། ། ཨ་ཕའི་རེ་བས་བརྫིས་པའི་རྩམ་པར་དོ་ཟླ་མེད། ། སྔོན་བྱོན་མེས་པོས་ཆོལ་ཁ་ཁག་གསུམ་གྱི ། རང་རིགས་བུ་རབས་ཚ་རྒྱུད་ལྟོ་ཆས་སུ། ། ཤེས་རིག་བློ་ཡིས་བཏབ་པའི་ལྷ་ཡི་ནས། ། དྭངས་གཙང་གངས་ཆུའི་རྒྱུན་གྱིས་བསྐྱངས་ནས་འཁྲུངས། །